chaara-farmai-e-dil rasm-e-butan hai to sahi

chāra-farmā.ī-e-dil rasm-e-butāñ hai to sahī

abhī kuchh mehr-o-mohabbat kā nishāñ hai to sahī

naqsh-e-pā terā hai gar tū nahīñ ai hashr-ḳhirām

ik na ik bā.is-e-āshob-e-jahāñ hai to sahī

aap se aap to paidā nahīñ ye lāla-o-gul

koī āḳhir chaman-ārā-e-jahāñ hai to sahī

ye bhī kahte haiñ ki hai arz-e-tamannā be-sūd

ye bhī kahte haiñ tire muñh meñ zabāñ hai to sahī

jalva-e-dost ko samjhā nahīñ ye baat hai aur

jalva-e-dost muhīt-e-dil-o-jāñ hai to sahī

chāhiye aur tujhe kyā pa.e-hañgāma-e-husn

tere qurbān ye sab kaun-o-makāñ hai to sahī

ham ne maanā ki nahīñ 'hālī' o 'majrūh' 'nihāl'

'mīr' o 'ġhālib' kā ye ejāz-e-bayāñ hai to sahī

chaara-farmai-e-dil rasm-e-butan hai to sahi

abhi kuchh mehr-o-mohabbat ka nishan hai to sahi

naqsh-e-pa tera hai gar tu nahin ai hashr-KHiram

ek na ek bais-e-ashob-e-jahan hai to sahi

aap se aap to paida nahin ye lala-o-gul

koi aaKHir chaman-ara-e-jahan hai to sahi

ye bhi kahte hain ki hai arz-e-tamanna be-sud

ye bhi kahte hain tere munh mein zaban hai to sahi

jalwa-e-dost ko samjha nahin ye baat hai aur

jalwa-e-dost muhit-e-dil-o-jaan hai to sahi

chahiye aur tujhe kya pae-hangama-e-husn

tere qurban ye sab kaun-o-makan hai to sahi

hum ne mana ki nahin 'haali' o 'majruh' 'nihaal'

'mir' o 'ghaalib' ka ye ejaz-e-bayan hai to sahi