chaaron jaanib aaine hain bolta koi nahin

chāroñ jānib aa.ine haiñ boltā koī nahīñ

de rahā huuñ dastakeñ dar kholtā koī nahīñ

ik yaqīn-o-be-yaqīnī kā ḳhalā hai darmiyāñ

log bahre ho ga.e yā boltā koī nahīñ

garm āvāzoñ kī rut meñ kitne jharnoñ jaise naam

vo nahīñ to kaan meñ ras gholtā koī nahīñ

ghoñsle ujḌe the ik din āñdhiyoñ meñ aur ab

ḳhvāhish-e-parvāz meñ par toltā koī nahīñ

jugnuoñ ko qaid se āzād kar detā hai vo

shāḳh-e-shab par jab sitāra Doltā koī nahīñ

kaun kis ko jāntā hai ā.inoñ ke shahr meñ

ham vo patthar haiñ ki jin ko moltā koī nahīñ

ye to bas ham ne gañvā.e ret meñ gauhar 'kafīl'

ḳhaak meñ varna to motī roltā koī nahīñ

chaaron jaanib aaine hain bolta koi nahin

de raha hun dastaken dar kholta koi nahin

ek yaqin-o-be-yaqini ka KHala hai darmiyan

log bahre ho gae ya bolta koi nahin

garm aawazon ki rut mein kitne jharnon jaise nam

wo nahin to kan mein ras gholta koi nahin

ghonsle ujDe the ek din aandhiyon mein aur ab

KHwahish-e-parwaz mein par tolta koi nahin

jugnuon ko qaid se aazad kar deta hai wo

shaKH-e-shab par jab sitara Dolta koi nahin

kaun kis ko jaanta hai aainon ke shahr mein

hum wo patthar hain ki jin ko molta koi nahin

ye to bas hum ne ganwae ret mein gauhar 'kafil'

KHak mein warna to moti rolta koi nahin