chaaron or ab phul hi phul hain kya ginte ho daghon ko

chāroñ or ab phuul hī phuul haiñ kyā ginte ho dāġhoñ ko

ho taufīq to dil se lagāo in nau-rusta bāġhoñ ko

jalte sahrā kī maujoñ par girte-paḌte rah-rav haiñ

chashma-e-āzādī ke jo ab tak DhūñDh rahe haiñ surāġhoñ ko

bād-e-havādis ke shahpar ḳhud un ko raah dikhāte haiñ

vaqt ke dhāre par chhoḌā hai ham ne aise charāġhoñ ko

kunj-e-qafas go kunj-e-qafas hai lekin ab ke bahārāñ meñ

ham ne mahaktā paayā josh-e-tasavvur-e-gul se dimāġhoñ ko

sub.h-e-roz-e-ādam-e-nau hai dhuum machī hai ghar ghar meñ

sāthiyo uTTho subūhī se chalkā.eñ bhar ke ayāġhoñ ko

chaaron or ab phul hi phul hain kya ginte ho daghon ko

ho taufiq to dil se lagao in nau-rusta baghon ko

jalte sahra ki maujon par girte-paDte rah-raw hain

chashma-e-azadi ke jo ab tak DhunDh rahe hain suraghon ko

baad-e-hawadis ke shahpar KHud un ko rah dikhate hain

waqt ke dhaare par chhoDa hai hum ne aise charaghon ko

kunj-e-qafas go kunj-e-qafas hai lekin ab ke bahaaran mein

hum ne mahakta paya josh-e-tasawwur-e-gul se dimaghon ko

subh-e-roz-e-adam-e-nau hai dhum machi hai ghar ghar mein

sathiyo uTTho subuhi se chalkaen bhar ke ayaghon ko