chaDh ke dar-o-rasan par ye kya de gaya

chaḌh ke dār-o-rasan par ye kyā de gayā

ek dīvāna dars-e-vafā de gayā

us ko qātil kahūñ yā masīhā kahūñ

zahr de kar jo mujh ko davā de gayā

rāh-e-ulfat meñ jab gul khilānā paḌā

kaam talvoñ kā har aabla de gayā

ham ne māñgā thā ulfat-bharā ek dil

koī TuuTā huā aa.ina de gayā

āñsuoñ ke samandar nahānā paḌā

koī hañsne kī aisī sazā de gayā

naz' ke vaqt kī de ke bechainiyāñ

mujh ko jiine kī zālim du'ā de gayā

'shauq' chhū luuñ to miTTī bhī sonā bane

'ishq vo nusḳha-e-kīmiyā de gayā

chaDh ke dar-o-rasan par ye kya de gaya

ek diwana dars-e-wafa de gaya

us ko qatil kahun ya masiha kahun

zahr de kar jo mujh ko dawa de gaya

rah-e-ulfat mein jab gul khilana paDa

kaam talwon ka har aabla de gaya

hum ne manga tha ulfat-bhara ek dil

koi TuTa hua aaina de gaya

aansuon ke samandar nahana paDa

koi hansne ki aisi saza de gaya

naz' ke waqt ki de ke bechainiyan

mujh ko jine ki zalim du'a de gaya

'shauq' chhu lun to miTTi bhi sona bane

'ishq wo nusKHa-e-kimiya de gaya