chaDhe jo dhup tamazat se jism hanpte hain

chaḌhe jo dhuup tamāzat se jism hāñpte haiñ

jo din bujhe to sitāroñ se raat Dhāñpte haiñ

añdherī raat pur-asrār ghar makīñ chup-chāp

muhīb saa.e khulī khiḌkiyoñ meñ jhāñkte haiñ

ḳhayāl-o-fikr kī taqvīm meñ sar-e-aflāk

diye jalāte haiñ taare ufuq pe Tāñkte haiñ

shikan se lahje kī dil meñ darāḌ paḌtī hai

so be-ruḳhī tere māthe ke bal se nāpte haiñ

shagun ke phuul jale sūrajoñ ke tasht meñ haiñ

ye kis ke aks haiñ jo aarsī meñ jhāñkte haiñ

jo zindagī kī harārat nahīñ sameT sake

vo ġham-nazhād sabhī mausamoñ meñ kāñpte haiñ

bahut buland uḌānoñ kī aarzū kab hai

hamāre ḳhvāb to chiḌiyoñ se pañkh māñgte haiñ

guzartā vaqt jinheñ rāste meñ chhoḌ gayā

vo umr bhar ke musāfir haiñ ḳhaak phāñkte haiñ

chaDhe jo dhup tamazat se jism hanpte hain

jo din bujhe to sitaron se raat Dhanpte hain

andheri raat pur-asrar ghar makin chup-chap

muhib sae khuli khiDkiyon mein jhankte hain

KHayal-o-fikr ki taqwim mein sar-e-aflak

diye jalate hain tare ufuq pe Tankte hain

shikan se lahje ki dil mein daraD paDti hai

so be-ruKHi tere mathe ke bal se napte hain

shagun ke phul jale surajon ke tasht mein hain

ye kis ke aks hain jo aarsi mein jhankte hain

jo zindagi ki hararat nahin sameT sake

wo gham-nazhad sabhi mausamon mein kanpte hain

bahut buland uDanon ki aarzu kab hai

hamare KHwab to chiDiyon se pankh mangte hain

guzarta waqt jinhen raste mein chhoD gaya

wo umr bhar ke musafir hain KHak phankte hain