chaDhte hue dariya ki alamat nazar aae

chaḌhte hue dariyā kī alāmat nazar aa.e

ġhusse meñ vo kuchh aur qayāmat nazar aa.e

gum apne hī saa.e meñ haiñ haT jaa.eñ to shāyad

khoyā huā apnā qad-o-qāmat nazar aa.e

kyā qahr hai har siine meñ ik hashr bapā hai

ik-ādh girebāñ to salāmat nazar aa.e

kūche se tire nikle to sab shahr thā dushman

har aañkh meñ kuchh sañg malāmat nazar aa.e

ham kaise ye samjheñ ki pashemān hai qātil

chehre pe na jab harf-e-nadāmat nazar aa.e

ham morid-e-ilzām samajhte rahe un ko

dekhā to 'razā' ham hī malāmat nazar aa.e

chaDhte hue dariya ki alamat nazar aae

ghusse mein wo kuchh aur qayamat nazar aae

gum apne hi sae mein hain haT jaen to shayad

khoya hua apna qad-o-qamat nazar aae

kya qahr hai har sine mein ek hashr bapa hai

ik-adh gireban to salamat nazar aae

kuche se tere nikle to sab shahr tha dushman

har aankh mein kuchh sang malamat nazar aae

hum kaise ye samjhen ki pasheman hai qatil

chehre pe na jab harf-e-nadamat nazar aae

hum morid-e-ilzam samajhte rahe un ko

dekha to 'raza' hum hi malamat nazar aae