chain dam bhar ko sar-e-sham kahan hota hai

chain dam bhar ko sar-e-shām kahāñ hotā hai

dil sulagtā ho to ārām kahāñ hotā hai

nargis-e-nāz se jo mujh ko atā hotā thā

ab mire hisse meñ vo jaam kahāñ hotā hai

apnī himmat hī se hotī hai shikāyat mujh ko

shikva-e-gardish-e-ayyām kahāñ hotā hai

pyaar vo khel nahīñ jis kā ho anjām ba-ḳhair

dil magar vāqif-e-anjām kahāñ hotā hai

ādatan shaam ko uTh jaatī haiñ merī nazreñ

aur vo chāñd sar-e-bām kahāñ hotā hai

dil hī dil meñ maiñ tirā naam liyā kartā huuñ

mere hoñToñ pe tirā naam kahāñ hotā hai

rāh-e-dushvār-e-vafā zer-e-qadam hai lekin

hausla dil ko bahar-gām kahāñ hotā hai

iltifāt ek baḌā vasf hai sab jānte haiñ

ye magar sheva-e-asnām kahāñ hotā hai

kis ko miltī hai yahāñ husn-shanāsī yaaro

tohfa-e-zauq-e-nazar aam kahāñ hotā hai

kuchh ḳhabar hai tujhe 'maġhmūm' ki tujh sā shā.ir

laakh gumnām ho gumnām kahāñ hotā hai

chain dam bhar ko sar-e-sham kahan hota hai

dil sulagta ho to aaram kahan hota hai

nargis-e-naz se jo mujh ko ata hota tha

ab mere hisse mein wo jam kahan hota hai

apni himmat hi se hoti hai shikayat mujh ko

shikwa-e-gardish-e-ayyam kahan hota hai

pyar wo khel nahin jis ka ho anjam ba-KHair

dil magar waqif-e-anjam kahan hota hai

aadatan sham ko uTh jati hain meri nazren

aur wo chand sar-e-baam kahan hota hai

dil hi dil mein main tera nam liya karta hun

mere honTon pe tera nam kahan hota hai

rah-e-dushwar-e-wafa zer-e-qadam hai lekin

hausla dil ko bahar-gam kahan hota hai

iltifat ek baDa wasf hai sab jaante hain

ye magar shewa-e-asnam kahan hota hai

kis ko milti hai yahan husn-shanasi yaro

tohfa-e-zauq-e-nazar aam kahan hota hai

kuchh KHabar hai tujhe 'maghmum' ki tujh sa shair

lakh gumnam ho gumnam kahan hota hai