chain furqat mein kabhi sham-o-sahar ne na diya

chain furqat meñ kabhī shām-o-sahar ne na diyā

dard-e-dil ne to kabhī dard-e-jigar ne na diyā

jab bhī aaya hai tirī zulf-e-pareshāñ kā ḳhayāl

merī suljhī huī fikroñ ko sañvarne na diyā

the pareshāñ to bahut umr-e-ravāñ ke aurāq

ham ne shīrāza-e-ulfat ko bikharne na diyā

imtihāñ zarf kā rindoñ ke rahā pesh-e-nazar

aaj saaqī ne kisī jaam ko bharne na diyā

shām-e-furqat kī havā.eñ to balā ban ke rahīñ

muzhda-e-vasl kabhī bād-e-sahar ne na diyā

aa gayā sabr-o-tavakkul na rahī hirs-o-havas

be-zarī ne vo diyā mujh ko jo zar ne na diyā

chalte rahte haiñ yūñhī rāh-e-vafā meñ 'sāqib'

ab bhī manzil kā pata rāh-guzar ne na diyā

chain furqat mein kabhi sham-o-sahar ne na diya

dard-e-dil ne to kabhi dard-e-jigar ne na diya

jab bhi aaya hai teri zulf-e-pareshan ka KHayal

meri suljhi hui fikron ko sanwarne na diya

the pareshan to bahut umr-e-rawan ke auraq

hum ne shiraaza-e-ulfat ko bikharne na diya

imtihan zarf ka rindon ke raha pesh-e-nazar

aaj saqi ne kisi jam ko bharne na diya

sham-e-furqat ki hawaen to bala ban ke rahin

muzhda-e-wasl kabhi baad-e-sahar ne na diya

aa gaya sabr-o-tawakkul na rahi hirs-o-hawas

be-zari ne wo diya mujh ko jo zar ne na diya

chalte rahte hain yunhi rah-e-wafa mein 'saqib'

ab bhi manzil ka pata rah-guzar ne na diya