chal tu jita man liya na aa tu mujhko haara dekh

chal tū jiitā maan liyā nā aa tū mujh ko haarā dekh

maiñ qismat vaale ko dekhūñ tū qismat kā maarā dekh

tūfāñ sar par mañDlā.e hai kitnī duur kināra dekh

maiñ kashtī kī hālat dekhūñ tū dariyā kā dhārā dekh

sar par aag ugaltā sūraj paañv tale angāra dekh

apnī duniyā piiTh pe laade niklā ik banjārā dekh

majbūrī meñ hañstā joker pyāsā hāthī bhūke sher

ab circus meñ baiTh jā pyāre khel tamāshā saarā dekh

band gharoñ meñ baiTh ke mat kar tū zulf-o-ruḳhsār kī baat

ḳhanjar merī gardan par hai khiḌkī khol nazāra dekh

bhuul ga.e kyā qasmeñ va.ade saath meñ ham ko chalnā thā

raah badalnī hai kyā tujh ko jā pahle kaffāra dekh

masnad par kyoñ dekh rahā hai ġhaur se apne hāthoñ ko

kyā dāman bhī dekh liyā hai phir se dekh dobāra dekh

terī saf meñ kaun hai apnā kaun munāfiq dekh to le

khanak rahī talvār kā hogā lahja ek ishāra dekh

rishte-nāte zaḳhmī ho ga.e is dīvār ke saa.e meñ

sadiyoñ ke pushtainī ghar meñ āñgan kā baTvārā dekh

itnī duur falak kī jānib gardan moḌ ke taknā kyā

ghar ke ek diye meñ raushan sūraj chāñd sitāra dekh

chal tu jita man liya na aa tu mujh ko haara dekh

main qismat wale ko dekhun tu qismat ka mara dekh

tufan sar par manDlae hai kitni dur kinara dekh

main kashti ki haalat dekhun tu dariya ka dhaara dekh

sar par aag ugalta suraj panw tale angara dekh

apni duniya piTh pe lade nikla ek banjara dekh

majburi mein hansta joker pyasa hathi bhuke sher

ab circus mein baiTh ja pyare khel tamasha sara dekh

band gharon mein baiTh ke mat kar tu zulf-o-ruKHsar ki baat

KHanjar meri gardan par hai khiDki khol nazara dekh

bhul gae kya qasmen wade sath mein hum ko chalna tha

rah badalni hai kya tujh ko ja pahle kaffara dekh

masnad par kyon dekh raha hai ghaur se apne hathon ko

kya daman bhi dekh liya hai phir se dekh dobara dekh

teri saf mein kaun hai apna kaun munafiq dekh to le

khanak rahi talwar ka hoga lahja ek ishaara dekh

rishte-nate zaKHmi ho gae is diwar ke sae mein

sadiyon ke pushtaini ghar mein aangan ka baTwara dekh

itni dur falak ki jaanib gardan moD ke takna kya

ghar ke ek diye mein raushan suraj chand sitara dekh