chalega kaun mere sath ham-safar ki tarah

chalegā kaun mire saath ham-safar kī tarah

kisī kī raah nahīñ merī rahguzar kī tarah

mire yaqīn kā is meñ qusūr hī kyā hai

fareb-sāz mile mujh ko mo'atabar kī tarah

na imtiyāz rahā kam-nazar zamāne ko

dikhā.ī dete haiñ sab aib bhī hunar kī tarah

vo koī shīsh-mahal ho ki qasr-e-shāhī ho

ġharīb ko na milegā sukūn ghar kī tarah

nahīñ ḳhulūs kā me.aar shahr meñ tere

yahāñ zamīr kā saudā hai māl-o-zar kī tarah

mile zarūr tire āstāñ ko sar lākhoñ

magar taḌap na kisī meñ hai mere sar kī tarah

chamakte kāñch ke TukḌe fareb dete haiñ

'nazar' ke sāmne aate haiñ vo guhar kī tarah

chalega kaun mere sath ham-safar ki tarah

kisi ki rah nahin meri rahguzar ki tarah

mere yaqin ka is mein qusur hi kya hai

fareb-saz mile mujh ko mo'atabar ki tarah

na imtiyaz raha kam-nazar zamane ko

dikhai dete hain sab aib bhi hunar ki tarah

wo koi shish-mahal ho ki qasr-e-shahi ho

gharib ko na milega sukun ghar ki tarah

nahin KHulus ka mear shahr mein tere

yahan zamir ka sauda hai mal-o-zar ki tarah

mile zarur tere aastan ko sar lakhon

magar taDap na kisi mein hai mere sar ki tarah

chamakte kanch ke TukDe fareb dete hain

'nazar' ke samne aate hain wo guhar ki tarah