chalo kuchh to rah tai ho na chale to bhul hogi

chalo kuchh to raah tai ho na chale to bhuul hogī

abhī band har galī hai jo khulegī tuul hogī

tire husn kī vadī.at mirī jur.at-e-nazāra

tire rū-ba-rū jhukegī to nazar kī bhuul hogī

mire ham-safar baḌheñge mujhe rāsta batā kar

mire paañv se uḌī hai mire sar pe dhuul hogī

mujhe qibla-rū biThā kar mire haath uThāne vaalo

ye yaqīn bhī dilā do ki duā qubūl hogī

chalo maan leñ ye donoñ koī shai hai maslahat bhī

na sitam kā dil dukhegā na vafā malūl hogī

tirā fan-e-qissa-goī abhī daar tak hī pahuñchā

mire shauq kī kahānī abhī aur tuul hogī

vo lahū kī dhaar 'afzal' jo hai qarz ḳhanjaroñ par

na kareñge ham taqāzā na kabhī vasūl hogī

chalo kuchh to rah tai ho na chale to bhul hogi

abhi band har gali hai jo khulegi tul hogi

tere husn ki wadiat meri jurat-e-nazara

tere ru-ba-ru jhukegi to nazar ki bhul hogi

mere ham-safar baDhenge mujhe rasta bata kar

mere panw se uDi hai mere sar pe dhul hogi

mujhe qibla-ru biTha kar mere hath uThane walo

ye yaqin bhi dila do ki dua qubul hogi

chalo man len ye donon koi shai hai maslahat bhi

na sitam ka dil dukhega na wafa malul hogi

tera fan-e-qissa-goi abhi dar tak hi pahuncha

mere shauq ki kahani abhi aur tul hogi

wo lahu ki dhaar 'afzal' jo hai qarz KHanjaron par

na karenge hum taqaza na kabhi wasul hogi