chalo yun hi sahi tark-e-talluq kar hi lete hain

chalo yuuñ hī sahī tark-e-ta.alluq kar hī lete haiñ

jo tum ḳhush ho to ham marne se pahle mar hī lete haiñ

agarche ham tumhārī hī tarah ḳhud.dār haiñ phir bhī

tumhāre naam par kuchh roz aaheñ bhar hī lete haiñ

tumhāre ishq kī tohmat bahut achchhī lagī ham ko

koī bhī chiiz lenī ho to ham behtar hī lete haiñ

ḳhudā ke ḳhauf se khultā hai nekī kā jo darvāza

to ham bhī nek banñe ko ḳhudā se Dar hī lete haiñ

rahe nuqsān meñ ab ke bhī kārobār-e-hastī meñ

ki aksar ham sitāroñ kī jagah patthar hī lete haiñ

nahīñ hai garm-joshī kī tapish baaqī agar tujh meñ

to phir be-mehriyoñ kī ThanD meñ ham Thar hī lete haiñ

'qatīl' in qātiloñ kā sāmnā tum hosh se karnā

kabhī lete the ye dil bhī magar ab sar hī lete haiñ

chalo yun hi sahi tark-e-talluq kar hi lete hain

jo tum KHush ho to hum marne se pahle mar hi lete hain

agarche hum tumhaari hi tarah KHuddar hain phir bhi

tumhaare nam par kuchh roz aahen bhar hi lete hain

tumhaare ishq ki tohmat bahut achchhi lagi hum ko

koi bhi chiz leni ho to hum behtar hi lete hain

KHuda ke KHauf se khulta hai neki ka jo darwaza

to hum bhi nek banne ko KHuda se Dar hi lete hain

rahe nuqsan mein ab ke bhi karobar-e-hasti mein

ki aksar hum sitaron ki jagah patthar hi lete hain

nahin hai garm-joshi ki tapish baqi agar tujh mein

to phir be-mehriyon ki ThanD mein hum Thar hi lete hain

'qatil' in qatilon ka samna tum hosh se karna

kabhi lete the ye dil bhi magar ab sar hi lete hain