chalta rahunga chahe koi ham-safar na ho

chaltā rahūñgā chāhe koī ham-safar na ho

us samt ki jahāñ koī hijrat kā Dar na ho

duniyā ke tūl-o-arz meñ dekhā nahīñ kabhī

aisā maqām jis pe kisī kā guzar na ho

jalte raheñ firāq kī hiddat meñ umr-bhar

shāyad kabhī bhī ma.arka-e-hijr sar na ho

ḳhairāt husn-e-yār kī shāyad na mil sake

mumkin hai vo hasīn bhī kal baam par na ho

duniyā tasavvurāt kī kitnī hasīn hai

kyā fā.eda ki jab koī tasvīr-gar na ho

chāhe ye zindagī kā safar dasht meñ kaTe

lekin tirā faqīr kahīñ dar-ba-dar na ho

duurī kā shauq shauq se puurā kiyā gayā

ḳhvāhish thī vo qarīb mire is qadar na ho

tanhā tavīl rastoñ pe chalnā muhāl hai

merā tire baġhair kahīñ bhī safar na ho

shāyad ki koī yaad muqayyad rahe mudām

shāyad visāl-e-yār kā lamha basar na ho

mumkin hai us taraf se palaT kar na aa sako

mumkin hai us taraf koī achchhī ḳhabar na ho

tujh se bichhaḌ ke chaltā rahūñ raah par ravāñ

dariyā kā ain vast ho lekin bhañvar na ho

chalta rahunga chahe koi ham-safar na ho

us samt ki jahan koi hijrat ka Dar na ho

duniya ke tul-o-arz mein dekha nahin kabhi

aisa maqam jis pe kisi ka guzar na ho

jalte rahen firaq ki hiddat mein umr-bhar

shayad kabhi bhi marka-e-hijr sar na ho

KHairaat husn-e-yar ki shayad na mil sake

mumkin hai wo hasin bhi kal baam par na ho

duniya tasawwuraat ki kitni hasin hai

kya faeda ki jab koi taswir-gar na ho

chahe ye zindagi ka safar dasht mein kaTe

lekin tera faqir kahin dar-ba-dar na ho

duri ka shauq shauq se pura kiya gaya

KHwahish thi wo qarib mere is qadar na ho

tanha tawil raston pe chalna muhaal hai

mera tere baghair kahin bhi safar na ho

shayad ki koi yaad muqayyad rahe mudam

shayad visal-e-yar ka lamha basar na ho

mumkin hai us taraf se palaT kar na aa sako

mumkin hai us taraf koi achchhi KHabar na ho

tujh se bichhaD ke chalta rahun rah par rawan

dariya ka ain wast ho lekin bhanwar na ho