chalte chalte sathi koi bichhDa to afsos hua

chalte chalte sāthī koī bichhḌā to afsos huā

hāthoñ se jab haath kisī kā chhūTā to afsos huā

kitnī naav Dubo kar ham ne dariyā kā ruḳh badlā thā

moḌ pe aa kar suukh gayā jab dariyā to afsos huā

dil kā karb chhupāne kā fan mushkil hai āsān nahīñ

hañste hañste us ko rotā dekhā to afsos huā

ye mat pūchho un se kyā kyā ummīdeñ vābasta thiiñ

patthar se Takrā ke shīsha TuuTā to afsos huā

duniyā kī be-rāh-ravī par pahroñ sochā kartā thā

aaj zarā apne baare meñ sochā to afsos huā

duniyā kī mauhūm fazā meñ kyā kyā kuchh ham bhuul ga.e

bhūle se 'irfān' koī yaad aayā to afsos huā

chalte chalte sathi koi bichhDa to afsos hua

hathon se jab hath kisi ka chhuTa to afsos hua

kitni naw Dubo kar hum ne dariya ka ruKH badla tha

moD pe aa kar sukh gaya jab dariya to afsos hua

dil ka karb chhupane ka fan mushkil hai aasan nahin

hanste hanste us ko rota dekha to afsos hua

ye mat puchho un se kya kya ummiden wabasta thin

patthar se Takra ke shisha TuTa to afsos hua

duniya ki be-rah-rawi par pahron socha karta tha

aaj zara apne bare mein socha to afsos hua

duniya ki mauhum faza mein kya kya kuchh hum bhul gae

bhule se 'irfan' koi yaad aaya to afsos hua