chamak hai ishq ki tira-shabi mein pahle se

chamak hai 'ishq kī tīra-shabī meñ pahle se

maiñ jal rahā huuñ isī raushnī meñ pahle se

chalī thī ḳhaak bhī merī vahīñ bikharne ko

havā ne raqs kiyā us galī meñ pahle se

koī bhī halqa-e-zanjīr ho asiir huuñ maiñ

tire hī silsila-e-dilbarī meñ pahle se

tire visāl se kuchh kam nahīñ umīd-e-visāl

so ham halāk hue haiñ ḳhushī meñ pahle se

Dubo diyā mujhe mere lahū ne āḳhir-kār

bhañvar to so.e hue the nadī meñ pahle se

khulā ki terā hī paikar misāl-e-sūrat-e-sang

chhupā huā thā mirī shā'irī meñ pahle se

chamak hai 'ishq ki tira-shabi mein pahle se

main jal raha hun isi raushni mein pahle se

chali thi KHak bhi meri wahin bikharne ko

hawa ne raqs kiya us gali mein pahle se

koi bhi halqa-e-zanjir ho asir hun main

tere hi silsila-e-dilbari mein pahle se

tere visal se kuchh kam nahin umid-e-visal

so hum halak hue hain KHushi mein pahle se

Dubo diya mujhe mere lahu ne aaKHir-kar

bhanwar to soe hue the nadi mein pahle se

khula ki tera hi paikar misal-e-surat-e-sang

chhupa hua tha meri sha'iri mein pahle se