chamak mein barq nahin zau mein aaftab nahin

chamak meñ barq nahīñ zau meñ āftāb nahīñ

vo aa.ina hai tirā jis meñ ḳhāk-e-āb nahīñ

subū-o-jām haiñ ḳhālī aur iztirāb nahīñ

tirī nazar to hai saaqī agar sharāb nahīñ

jahān-e-ishq meñ is se baḌā azaab nahīñ

ki laakh jalve haiñ aur dekhne kī taab nahīñ

haqīqat-e-saqar-o-ḳhuld kyoñ samajh na sakūñ

janāb-e-shaiḳh maiñ mast-e-mai-e-savāb nahīñ

ġhalat ki shaġhl meñ mai-ḳhvār kam hai suufī se

ye shaġhl-e-jām magar shaġhl-e-āftāb nahīñ

ḳhudā ko sauñp na duuñ kyoñ sahīfa-e-armāñ

duā-e-vaqt-e-sahar bhī to kāmyāb nahīñ

rumūz-e-ishq se vāqif ho kis tarah vaa.iz

ye vo kitāb hai jo dāḳhil-e-nisāb nahīñ

tire karam kā bharosa hai dāvar-e-mahshar

yahāñ to pursish-e-āmāl kā javāb nahīñ

hazār parda-e-armāñ haiñ dil ke shīshe par

nahīñ nahīñ tirī tasvīr be-naqāb nahīñ

nashāt-ḳhāna-e-ālam meñ umr yuuñ guzrī

kabhī sharāb nahīñ aur kabhī kabāb nahīñ

niyāz-mand jo pahuñche to kis tarah pahuñche

harīm-e-nāz meñ naala bhī bāryāb nahīñ

haram ko jaa.eñ to kyā jaa.eñ hazrat-e-'shāġhil'

vahāñ rabāb nahīñ shāhid-o-sharāb nahīñ

chamak mein barq nahin zau mein aaftab nahin

wo aaina hai tera jis mein KHak-e-ab nahin

subu-o-jam hain KHali aur iztirab nahin

teri nazar to hai saqi agar sharab nahin

jahan-e-ishq mein is se baDa azab nahin

ki lakh jalwe hain aur dekhne ki tab nahin

haqiqat-e-saqar-o-KHuld kyon samajh na sakun

janab-e-shaiKH main mast-e-mai-e-sawab nahin

ghalat ki shaghl mein mai-KHwar kam hai sufi se

ye shaghl-e-jam magar shaghl-e-aftab nahin

KHuda ko saunp na dun kyon sahifa-e-arman

dua-e-waqt-e-sahar bhi to kaamyab nahin

rumuz-e-ishq se waqif ho kis tarah waiz

ye wo kitab hai jo daKHil-e-nisab nahin

tere karam ka bharosa hai dawar-e-mahshar

yahan to pursish-e-amal ka jawab nahin

hazar parda-e-arman hain dil ke shishe par

nahin nahin teri taswir be-naqab nahin

nashat-KHana-e-alam mein umr yun guzri

kabhi sharab nahin aur kabhi kabab nahin

niyaz-mand jo pahunche to kis tarah pahunche

harim-e-naz mein nala bhi baryab nahin

haram ko jaen to kya jaen hazrat-e-'shaghil'

wahan rabab nahin shahid-o-sharab nahin