chamak yunhi nahin lafzon mein aai

chamak yūñhī nahīñ lafzoñ meñ aa.ī

kiyā hai ḳhūn-e-dil ko raushnā.ī

mire chehre se chipkī thī udāsī

hañsī māyūs ho kar lauT aa.ī

tamannāoñ ne kī sahrā-navardī

junūñ ne shahr meñ hī ḳhaak uḌaa.ī

maiñ dil kī baat sunñe kā huuñ aadī

mubārak tum ko patthar kī ḳhudā.ī

kitābeñ 'ishq kī gum ho ga.ī haiñ

adhūrī rah ga.ī merī paḌhā.ī

ujālā bhar gayā kamre meñ mere

tirī tasvīr kī hai rū-numā.ī

tamāzat merā māthā chūmtī hai

maiñ jab kartā huuñ sūraj kī burā.ī

nahīñ ḳhvāhish parinda shāḳh-e-dil par

to is ke TuuT jaane meñ bhalā.ī

ḳharīdegā 'musavvir' kaun tum ko

agar qīmat nahīñ apnī baḌhā.ī

chamak yunhi nahin lafzon mein aai

kiya hai KHun-e-dil ko raushnai

mere chehre se chipki thi udasi

hansi mayus ho kar lauT aai

tamannaon ne ki sahra-nawardi

junun ne shahr mein hi KHak uDai

main dil ki baat sunne ka hun aadi

mubarak tum ko patthar ki KHudai

kitaben 'ishq ki gum ho gai hain

adhuri rah gai meri paDhai

ujala bhar gaya kamre mein mere

teri taswir ki hai ru-numai

tamazat mera matha chumti hai

main jab karta hun suraj ki burai

nahin KHwahish parinda shaKH-e-dil par

to is ke TuT jaane mein bhalai

KHaridega 'musawwir' kaun tum ko

agar qimat nahin apni baDhai