chamakte chand khilte phul ke jaise lage mujhko

chamakte chāñd khilte phuul ke jaise lage mujh ko

tumhāre saath guzre din bahut achchhe lage mujh ko

agarche kuchh hī din the vo magar vo din qayāmat the

vahī kuchh din bahut betāb ab karne lage mujh ko

tumhārā saath thā jab tak to ġham bhī duur rahte the

hue tum duur jab mujh se to ġham milne lage mujh ko

kuchh aisā ġham huā zāhir mire chehre se furqat kā

kitāboñ kī tarah ye log ab paḌhne lage mujh ko

mohabbat karne vaale the tumhāre shahr vaale sab

tumhārī huuñ tumhāre baad bhī kahne lage mujh ko

yahī din the ki jo mujh ko kabhī the jaan se pyāre

yahī din ab bahut hī 'shāziya' khalne lage mujh ko

chamakte chand khilte phul ke jaise lage mujh ko

tumhaare sath guzre din bahut achchhe lage mujh ko

agarche kuchh hi din the wo magar wo din qayamat the

wahi kuchh din bahut betab ab karne lage mujh ko

tumhaara sath tha jab tak to gham bhi dur rahte the

hue tum dur jab mujh se to gham milne lage mujh ko

kuchh aisa gham hua zahir mere chehre se furqat ka

kitabon ki tarah ye log ab paDhne lage mujh ko

mohabbat karne wale the tumhaare shahr wale sab

tumhaari hun tumhaare baad bhi kahne lage mujh ko

yahi din the ki jo mujh ko kabhi the jaan se pyare

yahi din ab bahut hi 'shaziya' khalne lage mujh ko