chamakte suraj uchhaalte the kahan gae wo

chamakte sūraj uchhālte the kahāñ ga.e vo

jo shāmeñ sub.hoñ meñ Dhālte the kahāñ ga.e vo

badan meñ larzish ki din Dhalā jā rahā hai phir se

jo din se gardish nikālte the kahāñ ga.e vo

abhī to hāthoñ meñ hiddateñ un ke haath kī haiñ

abhī to ham ko sambhālte the kahāñ ga.e vo

utārte the ġhubār-e-lail-o-nihār ruḳh se

aur ā.inoñ ko ujālte the kahāñ ga.e vo

vo shāḳhche chhū ke sabz karne ke fan se vāqif

jo phuul hāthoñ meñ pālte the kahāñ ga.e vo

jo ism paḌhte the raushnī kā siyah-shaboñ meñ

jo lau charāġhoñ meñ Dālte the kahāñ ga.e vo

chamakte suraj uchhaalte the kahan gae wo

jo shamen subhon mein Dhaalte the kahan gae wo

badan mein larzish ki din Dhala ja raha hai phir se

jo din se gardish nikalte the kahan gae wo

abhi to hathon mein hiddaten un ke hath ki hain

abhi to hum ko sambhaalte the kahan gae wo

utarte the ghubar-e-lail-o-nihaar ruKH se

aur aainon ko ujalte the kahan gae wo

wo shaKHche chhu ke sabz karne ke fan se waqif

jo phul hathon mein palte the kahan gae wo

jo ism paDhte the raushni ka siyah-shabon mein

jo lau charaghon mein Dalte the kahan gae wo