chaman-badosh hue ja rahe hain virane

chaman-badosh hue jā rahe haiñ vīrāne

ye naqsh kaun se ubhre haiñ tere dīvāne

haiñ aks-e-ain-haqīqat diloñ ke kāshāne

ġhubār se na chhupeñge ye ā.ina-ḳhāne

hamārā ālam-e-begānagī ḳhudā kī panāh

ki raushnī meñ bhī apnī na ḳhud ko pahchāne

ab aur kaun se gul rah ga.e haiñ khilne ko

ilāhī ḳhair ho kyoñ muskurā.e dīvāne

rahe tasarruf-e-barham-nigāhī-e-sāqī

ki chashm-e-yās se Dhal Dhal ke aa.e paimāne

ḳhudī-e-husn bhī thī be-ḳhudī-e-ishq bhī thī

ki umr bhar vo hameñ ham unheñ na pahchāne

piyā karegā ba-miqdār-e-zarf har mai-kash

haTā.e jā.eñge ab mai-kadoñ se paimāne

ba-ehtirām-e-tajallī ba-qaid-e-ḳhuddārī

nigāh-e-sham.a se gir kar uThe na parvāne

jo kho ke rah ga.e unvān ke añdheroñ meñ

mirī nigāh meñ aise bhī haiñ kuchh afsāne

pahuñch sake na 'shifā' sarhad-e-haqīqat tak

fareb itne diye e'tibār-e-duniyā ne

chaman-badosh hue ja rahe hain virane

ye naqsh kaun se ubhre hain tere diwane

hain aks-e-ain-haqiqat dilon ke kashane

ghubar se na chhupenge ye aaina-KHane

hamara aalam-e-beganagi KHuda ki panah

ki raushni mein bhi apni na KHud ko pahchane

ab aur kaun se gul rah gae hain khilne ko

ilahi KHair ho kyon muskurae diwane

rahe tasarruf-e-barham-nigahi-e-saqi

ki chashm-e-yas se Dhal Dhal ke aae paimane

KHudi-e-husn bhi thi be-KHudi-e-ishq bhi thi

ki umr bhar wo hamein hum unhen na pahchane

piya karega ba-miqdar-e-zarf har mai-kash

haTae jaenge ab mai-kadon se paimane

ba-ehtiram-e-tajalli ba-qaid-e-KHuddari

nigah-e-shama se gir kar uThe na parwane

jo kho ke rah gae unwan ke andheron mein

meri nigah mein aise bhi hain kuchh afsane

pahunch sake na 'shifa' sarhad-e-haqiqat tak

fareb itne diye e'tibar-e-duniya ne