chaman chaman mein nae jun gulab khilte hain

chaman chaman meñ na.e juuñ gulāb khilte haiñ

hamāre ḳhuun se yuuñ inqalāb khilte haiñ

'ajīb zid hai ki murjhā ga.ī haiñ tā'bīreñ

magar na.e se phir āñkhoñ meñ ḳhvāb khilte haiñ

bas ik umiid liye jī rahe haiñ sahrā meñ

ham aise phuul faqat sun ke aab khilte haiñ

ka.ī javāb the jo bo ga.e savāloñ ko

ka.ī savāl haiñ jo lā-javāb khilte haiñ

kisī kā lams ḳhudāyā 'ayāñ na kar de inheñ

hamāre zaḳhm to zer-e-hijāb khilte haiñ

bujhe bujhe se charāġhoñ kī raushnī le kar

hamāre saa.e meñ phir āftāb khilte haiñ

chaman chaman mein nae jun gulab khilte hain

hamare KHun se yun inqalab khilte hain

'ajib zid hai ki murjha gai hain ta'biren

magar nae se phir aankhon mein KHwab khilte hain

bas ek umid liye ji rahe hain sahra mein

hum aise phul faqat sun ke aab khilte hain

kai jawab the jo bo gae sawalon ko

kai sawal hain jo la-jawab khilte hain

kisi ka lams KHudaya 'ayan na kar de inhen

hamare zaKHm to zer-e-hijab khilte hain

bujhe bujhe se charaghon ki raushni le kar

hamare sae mein phir aaftab khilte hain