chaman ka husn bahaaron ki shoKHiyan le kar

chaman kā husn bahāroñ kī shoḳhiyāñ le kar

vo aa rahe haiñ nigāhoñ meñ mastiyāñ le kar

tire ḳhulūs pe saaqī na harf aa jaa.e

maiñ pī rahā huuñ zamāne se talḳhiyāñ le kar

tumhārī shoḳh nigāhoñ ne tāzgī baḳhshī

diloñ ke ġhunche chaTakte haiñ siskiyāñ le kar

shu'ūr-e-zāt meñ ehsās kā diyā rakh do

zamāna madd-e-muqābil hai āñdhiyāñ le kar

mujhe na aa ke jagā denā ḳhvāb-e-shīrīñ se

maiñ so rahā huuñ tumhārī nishāniyāñ le kar

'adīm' aaj maiñ ahl-e-suḳhan kī mahfil se

chalā huuñ apne taḳhayyul kī dhajjiyāñ le kar

chaman ka husn bahaaron ki shoKHiyan le kar

wo aa rahe hain nigahon mein mastiyan le kar

tere KHulus pe saqi na harf aa jae

main pi raha hun zamane se talKHiyan le kar

tumhaari shoKH nigahon ne tazgi baKHshi

dilon ke ghunche chaTakte hain siskiyan le kar

shu'ur-e-zat mein ehsas ka diya rakh do

zamana madd-e-muqabil hai aandhiyan le kar

mujhe na aa ke jaga dena KHwab-e-shirin se

main so raha hun tumhaari nishaniyan le kar

'adim' aaj main ahl-e-suKHan ki mahfil se

chala hun apne taKHayyul ki dhajjiyan le kar