chaman ke dil-nashin KHush-rang manzaron ke charagh

chaman ke dil-nashīñ ḳhush-rañg manzaroñ ke charāġh

ye titliyoñ kī guzargāheñ ye guloñ ke charāġh

añdherī raat meñ barsāt kī mirī mohsin

chamaktī bijliyāñ ya.anī ye bādaloñ ke charāġh

mire qalam se munavvar hoñ zehn logoñ ke

jalā.ūñ bazm meñ duniyā kī tajraboñ ke charāġh

nazar se chūmā thā maiñ ne tumhāre jalvoñ ko

bhulā.e jaate nahīñ un hasīñ rutoñ ke charāġh

qadam uThānā kaThin ho gayā tirī jānib

bujhā diye mirī qismat ne rāstoñ ke charāġh

unheñ bujhā.egī fauran havā zamāne kī

jo ḳhvāb dekheñge mahloñ ke jhoñpaḌoñ ke charāġh

chaman ke dil-nashin KHush-rang manzaron ke charagh

ye titliyon ki guzargahen ye gulon ke charagh

andheri raat mein barsat ki meri mohsin

chamakti bijliyan yani ye baadalon ke charagh

mere qalam se munawwar hon zehn logon ke

jalaun bazm mein duniya ki tajrabon ke charagh

nazar se chuma tha main ne tumhaare jalwon ko

bhulae jate nahin un hasin ruton ke charagh

qadam uThana kaThin ho gaya teri jaanib

bujha diye meri qismat ne raston ke charagh

unhen bujhaegi fauran hawa zamane ki

jo KHwab dekhenge mahlon ke jhonpaDon ke charagh