chaman ke nau-damida gul bahaaron se KHafa baiThe

chaman ke nau-damīda gul bahāroñ se ḳhafā baiThe

sabāhat meñ ḳhalish paiham asīr-e-ġham havā baiThe

abhī fard-e-vafā ik jāñ-ba-lab hai shahr-e-giryāñ meñ

tabhī sab pā-ba-gil pahle bichhā farsh-e-azā baiThe

havā.eñ raaj kartī haiñ bujhā kar sham-e-ulfat ko

ye sun kar kunj-e-uzlat meñ sitam-kash muskurā baiThe

kahā jab ahl-e-bīnash ne jalāl-e-pādshāhī kyā

ġhubār-e-rah uThā kar ham havā meñ tab uḌā baiThe

kamāl-e-sabr bhī ham ko mayassar thā magar ham to

junūñ meñ apnī hastī ko zamāne se miTā baiThe

hamārī hasratoñ par ab lagī qadġhan adāvat kī

harīfoñ kī himāyat meñ rafīqoñ ko satā baiThe

matā-o-māl merā sab luTāyā rahbaroñ ne hai

gila ab rahzanoñ se kyā ki 'amjad' vo bachā baiThe

chaman ke nau-damida gul bahaaron se KHafa baiThe

sabahat mein KHalish paiham asir-e-gham hawa baiThe

abhi fard-e-wafa ek jaan-ba-lab hai shahr-e-giryan mein

tabhi sab pa-ba-gil pahle bichha farsh-e-aza baiThe

hawaen raj karti hain bujha kar sham-e-ulfat ko

ye sun kar kunj-e-uzlat mein sitam-kash muskura baiThe

kaha jab ahl-e-binash ne jalal-e-padshahi kya

ghubar-e-rah uTha kar hum hawa mein tab uDa baiThe

kamal-e-sabr bhi hum ko mayassar tha magar hum to

junun mein apni hasti ko zamane se miTa baiThe

hamari hasraton par ab lagi qadghan adawat ki

harifon ki himayat mein rafiqon ko sata baiThe

mata-o-mal mera sab luTaya rahbaron ne hai

gila ab rahzanon se kya ki 'amjad' wo bacha baiThe