chaman ko aag lagane ki baat karta hun

chaman ko aag lagāne kī baat kartā huuñ

samajh sako to Thikāne kī baat kartā huuñ

sharāb-e-talḳh pilāne kī baat kartā huuñ

ḳhud-āgahī ko jagāne kī baat kartā huuñ

suḳhanvaroñ ko jalāne kī baat kartā huuñ

ki jāgtoñ ko jagāne kī baat kartā huuñ

uThī huī hai jo rañgīnī-e-taġhazzul par

vo har naqāb girāne kī baat kartā huuñ

is anjuman se uThūñgā kharī kharī kah kar

phir anjuman meñ na aane kī baat kartā huuñ

yahāñ charāġh tale luuT hai añdherā hai

kahāñ charāġh jalāne kī baat kartā huuñ

vo bāġhbān! jo phūloñ se bair rakhtā hai

ye aap hī ke zamāne kī baat kartā huuñ

ravish ravish pe bichhā do babūl ke kāñTe

chaman se lutf uThāne kī baat kartā huuñ

vahāñ sharāb pilātā huuñ ahl-e-bīnash ko

jahāñ bhī ḳhuun bahāne kī baat kartā huuñ

mizāj-e-husn kahīñ bad-maza na ho jaa.e

adal badal ke fasāne kī baat kartā huuñ

magar fareb-dahī meñ darkār hai achhūtā-pan

tire fareb meñ aane kī baat kartā huuñ

vahīñ se sher meñ barjastagī nahīñ rahtī

jahāñ se haal chhupāne kī baat kartā huuñ

pilā rahā huuñ maiñ kāñToñ ko ḳhūn-e-dil ai 'shād'

guloñ ke rañg uḌāne kī baat kartā huuñ

chaman ko aag lagane ki baat karta hun

samajh sako to Thikane ki baat karta hun

sharab-e-talKH pilane ki baat karta hun

KHud-agahi ko jagane ki baat karta hun

suKHanwaron ko jalane ki baat karta hun

ki jagton ko jagane ki baat karta hun

uThi hui hai jo rangini-e-taghazzul par

wo har naqab girane ki baat karta hun

is anjuman se uThunga khari khari kah kar

phir anjuman mein na aane ki baat karta hun

yahan charagh tale luT hai andhera hai

kahan charagh jalane ki baat karta hun

wo baghban! jo phulon se bair rakhta hai

ye aap hi ke zamane ki baat karta hun

rawish rawish pe bichha do babul ke kanTe

chaman se lutf uThane ki baat karta hun

wahan sharab pilata hun ahl-e-binash ko

jahan bhi KHun bahane ki baat karta hun

mizaj-e-husn kahin bad-maza na ho jae

adal badal ke fasane ki baat karta hun

magar fareb-dahi mein darkar hai achhuta-pan

tere fareb mein aane ki baat karta hun

wahin se sher mein barjastagi nahin rahti

jahan se haal chhupane ki baat karta hun

pila raha hun main kanTon ko KHun-e-dil ai 'shad'

gulon ke rang uDane ki baat karta hun