chaman ko mausam-e-gul aa ke tazgi dega

chaman ko mausam-e-gul aa ke tāzgī degā

charāġh kī ye jibillat hai raushnī degā

baḌī umiid se maiḳhāne aa.e sahrā se

kise ḳhabar thī ki saaqī bhī tishnagī degā

ab un kī bazm meñ jaa.e to koī kyoñ jaa.e

pata hai zulm kā shaidā.ī bebasī degā

ḳhudā ke ghar meñ magar soch kar ye aa.e haiñ

ye ek sajda hameñ lutf-e-bandagī degā

na rakh umiid kabhī bazm-e-ishq chamkegī

ki husn ḳhūgar-e-zulmat hai tīrgī degā

jab us ne maut hī bāñTī hai umr bhar 'dānish'

to kaise maan leñ vo ham ko zindagī degā

chaman ko mausam-e-gul aa ke tazgi dega

charagh ki ye jibillat hai raushni dega

baDi umid se maiKHane aae sahra se

kise KHabar thi ki saqi bhi tishnagi dega

ab un ki bazm mein jae to koi kyon jae

pata hai zulm ka shaidai bebasi dega

KHuda ke ghar mein magar soch kar ye aae hain

ye ek sajda hamein lutf-e-bandagi dega

na rakh umid kabhi bazm-e-ishq chamkegi

ki husn KHugar-e-zulmat hai tirgi dega

jab us ne maut hi banTi hai umr bhar 'danish'

to kaise man len wo hum ko zindagi dega