chaman mein aamad-e-rangini-e-numu kahiye

chaman meñ āmad-e-rangīnī-e-numū kahiye

bahār aane ko tajdīd-e-rang-o-bū kahiye

maiñ gum huā to milā hai surāġh manzil kā

is āgahī ke safar ko hī justujū kahiye

na.e safar pe ga.e ham pahuñch ke manzil par

masāfatoñ ke tasalsul ko aarzū kahiye

nazar nazar hī meñ apnā mukālima kar ke

yuuñ boltī sī ḳhamoshī ko guftugū kahiye

talāsh ḳhud ko kiyā jab vahī nazar aaya

mirī talab ko usī dar kī aarzū kahiye

milā hai ḳhūn-e-jigar apnī ashk-rezī se

ki āñsuoñ ko Tapaktā huā lahū kahiye

zarā sañbhal ke hī kījegā shā'irī 'ādil'

ġhazal kī sinf ko urdu kī aabrū kahiye

chaman mein aamad-e-rangini-e-numu kahiye

bahaar aane ko tajdid-e-rang-o-bu kahiye

main gum hua to mila hai suragh manzil ka

is aagahi ke safar ko hi justuju kahiye

nae safar pe gae hum pahunch ke manzil par

masafaton ke tasalsul ko aarzu kahiye

nazar nazar hi mein apna mukalima kar ke

yun bolti si KHamoshi ko guftugu kahiye

talash KHud ko kiya jab wahi nazar aaya

meri talab ko usi dar ki aarzu kahiye

mila hai KHun-e-jigar apni ashk-rezi se

ki aansuon ko Tapakta hua lahu kahiye

zara sanbhal ke hi kijega sha'iri 'adil'

ghazal ki sinf ko urdu ki aabru kahiye