chaman mein jab bahaar aai to diwane machal uTThe

chaman meñ jab bahār aa.ī to dīvāne machal uTThe

huā jab zikr-e-chashm-e-mast paimāne machal uTThe

havā-e-fasl-e-gul aa.ī ghaTā ghanghor jab chhā.ī

chalā yuuñ daur-e-paimāna ki maiḳhāne machal uTThe

yaqīnan rabt-e-bāham koī husn-o-'ishq meñ hogā

jalī jab sham' mahfil meñ to parvāne machal uTThe

pilā.e jā are saaqī agar kuchh bhī hai mai baaqī

tirī dariyā-dilī dekhī to mastāne machal uTThe

kisī jān-e-vafā kā tazkira unvān-e-mahfil hai

bahāreñ jhuum uTThīñ aur afsāne machal uTThe

kuchh is andāz se zindāñ meñ paiġhām-e-bahār aayā

ki dīvāne to dīvāne the farzāne machal uTThe

chale ahl-e-junūñ josh-e-junūñ meñ jab bayābāñ ko

kiyā kāñToñ ne istiqbāl vīrāne machal uTThe

barahman mast hotā hai faqat nāqūs kī lai par

sunī bāñg-e-azāñ tasbīh ke daane machal uTThe

mire iḳhlās-o-jazb-e-dil kī ye tāsīr hai 'anjum'

yagānoñ kā to kyā kahnā hai begāne machal uTThe

chaman mein jab bahaar aai to diwane machal uTThe

hua jab zikr-e-chashm-e-mast paimane machal uTThe

hawa-e-fasl-e-gul aai ghaTa ghanghor jab chhai

chala yun daur-e-paimana ki maiKHane machal uTThe

yaqinan rabt-e-baham koi husn-o-'ishq mein hoga

jali jab sham' mahfil mein to parwane machal uTThe

pilae ja are saqi agar kuchh bhi hai mai baqi

teri dariya-dili dekhi to mastane machal uTThe

kisi jaan-e-wafa ka tazkira unwan-e-mahfil hai

bahaaren jhum uTThin aur afsane machal uTThe

kuchh is andaz se zindan mein paigham-e-bahaar aaya

ki diwane to diwane the farzane machal uTThe

chale ahl-e-junun josh-e-junun mein jab bayaban ko

kiya kanTon ne istiqbaal virane machal uTThe

barahman mast hota hai faqat naqus ki lai par

suni bang-e-azan tasbih ke dane machal uTThe

mere iKHlas-o-jazb-e-dil ki ye tasir hai 'anjum'

yaganon ka to kya kahna hai begane machal uTThe