chaman mein lala-o-gul par nikhaar bhi to nahin

chaman meñ lāla-o-gul par nikhār bhī to nahīñ

ḳhizāñ agar ye nahīñ hai bahār bhī to nahīñ

tamāzat-e-ġham-e-daurāñ se phuñk rahī hai hayāt

kahīñ pe sāya-e-gesū-e-yār bhī to nahīñ

ḳhayāl-e-tark-e-mohabbat bajā sahī lekin

ab apne dil pe hameñ iḳhtiyār bhī to nahīñ

kabhī to jān-e-vafā hai kabhī hai dushman-e-jāñ

tirī nazar kā koī e'tibār bhī to nahīñ

ba-īñ taġhāful-e-paiham sitam to ye hai 'surūr'

maiñ us kī ḳhātir-e-nāzuk pe baar bhī to nahīñ

chaman mein lala-o-gul par nikhaar bhi to nahin

KHizan agar ye nahin hai bahaar bhi to nahin

tamazat-e-gham-e-dauran se phunk rahi hai hayat

kahin pe saya-e-gesu-e-yar bhi to nahin

KHayal-e-tark-e-mohabbat baja sahi lekin

ab apne dil pe hamein iKHtiyar bhi to nahin

kabhi to jaan-e-wafa hai kabhi hai dushman-e-jaan

teri nazar ka koi e'tibar bhi to nahin

ba-in taghaful-e-paiham sitam to ye hai 'surur'

main us ki KHatir-e-nazuk pe bar bhi to nahin