chaman mein phulon ka daman-e-tar-tar bhi dekh

chaman meñ phūloñ kā dāmān-e-tār-tār bhī dekh

bahār dekh chukā hāsil-e-bahār bhī dekh

asīr-e-sub.h-e-tarab shām-e-sogvār bhī dekh

guzarte lamhoñ kā ik aur shāhkār bhī dekh

mah-o-nujūm ke jalvoñ se khelne vaale

fazā meñ phailā huā rang-e-intishār bhī dekh

tire ḳhayāl se aage tirī nazar se pare

jo pal rahe haiñ vo lamhāt-e-ḳhalfishār bhī dekh

nikal ke marmarīñ mahloñ ke sard-ḳhānoñ se

tapā tapā sā ġharīboñ kā reg-zār bhī dekh

bahār ġhuncha-o-gul se nazar haTā ke zarā

sisaktī qaum ke zaḳhmoñ kā lāla-zār bhī dekh

ba-nām-e-amn liye aslahoñ ke dāman se

jo uTh rahā hai vo tūfān-e-sho.ala-bār bhī dekh

lahū lahū hai jahāñ jism-e-āshtī 'ahmar'

sitam-rasīdoñ kā vo ḳhūñ-chakāñ dayār bhī dekh

chaman mein phulon ka daman-e-tar-tar bhi dekh

bahaar dekh chuka hasil-e-bahaar bhi dekh

asir-e-subh-e-tarab sham-e-sogwar bhi dekh

guzarte lamhon ka ek aur shahkar bhi dekh

mah-o-nujum ke jalwon se khelne wale

faza mein phaila hua rang-e-intishaar bhi dekh

tere KHayal se aage teri nazar se pare

jo pal rahe hain wo lamhat-e-KHalfishaar bhi dekh

nikal ke marmarin mahlon ke sard-KHanon se

tapa tapa sa gharibon ka reg-zar bhi dekh

bahaar ghuncha-o-gul se nazar haTa ke zara

sisakti qaum ke zaKHmon ka lala-zar bhi dekh

ba-nam-e-amn liye aslahon ke daman se

jo uTh raha hai wo tufan-e-shoala-bar bhi dekh

lahu lahu hai jahan jism-e-ashti 'ahmar'

sitam-rasidon ka wo KHun-chakan dayar bhi dekh