chaman mein rah ke bhi dil ko agar qarar nahin

chaman meñ rah ke bhī dil ko agar qarār nahīñ

to ye bahār kī tauhīn hai bahār nahīñ

tumhārā husn jo phūloñ se āshkār nahīñ

mirī nigāh bhī sharminda-e-bahār nahīñ

huzūr aap ke va.adoñ kā kyā yaqīñ aa.e

yahāñ to ziist pe bhī apnī e.atibār nahīñ

hai zindagī mirī ik hādisa jahāñ ke liye

mirī tabāhī pe kaun aaj ashk-bār nahīñ

vo aañkh kyā ki mohabbat meñ ḳhuuñ bahā na sake

vo dil hī kyā hai jo zaḳhmoñ se lāla-zār nahīñ

koī hazār sarāpā ḳhulūs ban jaa.e

hameñ kisī kā bhī 'anjum' ab e.atibār nahīñ

chaman mein rah ke bhi dil ko agar qarar nahin

to ye bahaar ki tauhin hai bahaar nahin

tumhaara husn jo phulon se aashkar nahin

meri nigah bhi sharminda-e-bahaar nahin

huzur aap ke wadon ka kya yaqin aae

yahan to zist pe bhi apni eatibar nahin

hai zindagi meri ek hadisa jahan ke liye

meri tabahi pe kaun aaj ashk-bar nahin

wo aankh kya ki mohabbat mein KHun baha na sake

wo dil hi kya hai jo zaKHmon se lala-zar nahin

koi hazar sarapa KHulus ban jae

hamein kisi ka bhi 'anjum' ab eatibar nahin