chaman mein rah ke bhi kyun dil ki virani nahin jati

chaman meñ rah ke bhī kyuuñ dil kī vīrānī nahīñ jaatī

bas itnī baat par logoñ kī hairānī nahīñ jaatī

muqaddar par huā huuñ jab se maiñ raazī usī din se

ḳhushī ho yā ki ġham chehre kī tābānī nahīñ jaatī

farishte bhī hamārī qismatoñ par naaz karte haiñ

magar apnī haqīqat ham se pahchānī nahīñ jaatī

anā kā mas.ala dīvāngī se kam nahīñ hotā

haqīqat kitnī bhī vāzeh ho vo maanī nahīñ jaatī

haqīqat meñ vo ā.īna-sifat insān hotā hai

ki tauba kar ke bhī jis kī pashemānī nahīñ jaatī

ye shikve aur ye hīle-bahāne kyuuñ abas kiije

jinheñ bachnā ho un kī pāk-dāmānī nahīñ jaatī

nazar meñ phir rahā hai bas kisī ke husn kā manzar

mazāq-e-dīd kī vo jalva-sāmānī nahīñ jaatī

mohabbat ke liye ab to riyā-kārī zarūrī hai

yahāñ ahl-e-junūñ kī qadr pahchānī nahīñ jaatī

qayāmat kī nishānī ye nahīñ to aur phir kyā hai

libās achchhe haiñ lekin phir bhī uryānī nahīñ jaatī

ta.alluq dūriyoñ se aur bhī mazbūt hotā hai

'sahar' insāñ kī lekin ḳhū-e-nādānī nahīñ jaatī

chaman mein rah ke bhi kyun dil ki virani nahin jati

bas itni baat par logon ki hairani nahin jati

muqaddar par hua hun jab se main raazi usi din se

KHushi ho ya ki gham chehre ki tabani nahin jati

farishte bhi hamari qismaton par naz karte hain

magar apni haqiqat hum se pahchani nahin jati

ana ka masala diwangi se kam nahin hota

haqiqat kitni bhi wazeh ho wo mani nahin jati

haqiqat mein wo aaina-sifat insan hota hai

ki tauba kar ke bhi jis ki pashemani nahin jati

ye shikwe aur ye hile-bahane kyun abas kije

jinhen bachna ho un ki pak-damani nahin jati

nazar mein phir raha hai bas kisi ke husn ka manzar

mazaq-e-did ki wo jalwa-samani nahin jati

mohabbat ke liye ab to riya-kari zaruri hai

yahan ahl-e-junun ki qadr pahchani nahin jati

qayamat ki nishani ye nahin to aur phir kya hai

libas achchhe hain lekin phir bhi uryani nahin jati

talluq duriyon se aur bhi mazbut hota hai

'sahar' insan ki lekin KHu-e-nadani nahin jati