chaman mein rah ke gulon par jab iKHtiyar na ho

chaman meñ rah ke guloñ par jab iḳhtiyār na ho

to vo chaman kabhī sharminda-e-bahār na ho

koī jahān meñ azmat bahār kī na kare

agar hamārā garebāñ hī taar taar na ho

ye bhed khul nahīñ saktā hai ahl-e-zāhir par

koī junūn-e-mohabbat kā rāzdār na ho

abhī to aisī hazāroñ shabeñ guzarnī haiñ

asīr-e-shām-e-alam itnā be-qarār na ho

vahī ki jis kī qayādat kareñ ġhalat rahbar

vo kārvāñ kabhī manzil se ham-kanār na ho

mirā jahān-e-tamannā ujāḌne vaale

tabāhiyoñ pe mirī dekh sharmsār na ho

vafā-shi.ār vafā kā na kar kabhī iz.hār

agar vafā kā zamāne ko e'tibār na ho

na luuñ panāh junūñ kī to kyā karūñ hamdam

kisī tarah bhī mire dil ko jab qarār na ho

galī meñ rahne kā do izn-e-mustaqil mujh ko

sukūñ vo chaah rahā huuñ jo musta.ār na ho

phir aane vaale havādis se kaun khelegā

safīna dāman-e-sāhil se ham-kanār na ho

yahī bahār agar hai to 'mauj' mumkin hai

junūñ ke haath ko dāman pe iḳhtiyār na ho

chaman mein rah ke gulon par jab iKHtiyar na ho

to wo chaman kabhi sharminda-e-bahaar na ho

koi jahan mein azmat bahaar ki na kare

agar hamara gareban hi tar tar na ho

ye bhed khul nahin sakta hai ahl-e-zahir par

koi junun-e-mohabbat ka raazdar na ho

abhi to aisi hazaron shaben guzarni hain

asir-e-sham-e-alam itna be-qarar na ho

wahi ki jis ki qayaadat karen ghalat rahbar

wo karwan kabhi manzil se ham-kanar na ho

mera jahan-e-tamanna ujaDne wale

tabahiyon pe meri dekh sharmsar na ho

wafa-shiar wafa ka na kar kabhi izhaar

agar wafa ka zamane ko e'tibar na ho

na lun panah junun ki to kya karun hamdam

kisi tarah bhi mere dil ko jab qarar na ho

gali mein rahne ka do izn-e-mustaqil mujh ko

sukun wo chah raha hun jo mustaar na ho

phir aane wale hawadis se kaun khelega

safina daman-e-sahil se ham-kanar na ho

yahi bahaar agar hai to 'mauj' mumkin hai

junun ke hath ko daman pe iKHtiyar na ho