chaman mera hai gul mera hai shaKH-e-ashiyan meri

chaman merā hai gul merā hai shāḳh-e-āshiyāñ merī

chaman kā pattā-pattā milkiyat hai bāġhbāñ merī

kareñge ġhaur ik ik baat par ahl-e-jahāñ merī

dahan hogā agar un kā to bolegī zabāñ merī

mire is rāz-e-sar-basta ko kyā ahl-e-jahāñ samjheñ

ye bas mujh par hī raushan hai ki nazreñ haiñ jahāñ merī

vahīñ tak manzil-e-irfāñ numāyāñ hotī jaatī hai

jahāñ tak jā rahī hai aaj gard-e-kārvāñ merī

jahāñ ahl-e-ḳhirad bhī hosh se begāna hote haiñ

paḌī hai be-ḳhudī meñ ik nazar aisī vahāñ merī

ḳhudā jaane ki kyā kyā hashr barpā hoñ sar-e-mahfil

munāsib hai to bas ye hai na khulvāo zabāñ merī

maiñ insāñ huuñ na kyoñ ho naaz mujh ko apnī hastī par

rahī hai 'fauq' barsoñ tak mashiyyat rāz-dāñ merī

chaman mera hai gul mera hai shaKH-e-ashiyan meri

chaman ka patta-patta milkiyat hai baghban meri

karenge ghaur ek ek baat par ahl-e-jahan meri

dahan hoga agar un ka to bolegi zaban meri

mere is raaz-e-sar-basta ko kya ahl-e-jahan samjhen

ye bas mujh par hi raushan hai ki nazren hain jahan meri

wahin tak manzil-e-irfan numayan hoti jati hai

jahan tak ja rahi hai aaj gard-e-karwan meri

jahan ahl-e-KHirad bhi hosh se begana hote hain

paDi hai be-KHudi mein ek nazar aisi wahan meri

KHuda jaane ki kya kya hashr barpa hon sar-e-mahfil

munasib hai to bas ye hai na khulwao zaban meri

main insan hun na kyon ho naz mujh ko apni hasti par

rahi hai 'fauq' barson tak mashiyyat raaz-dan meri