chaman walon se barq-e-be-aman kuchh aur kahti hai

chaman vāloñ se barq-e-be-amāñ kuchh aur kahtī hai

magar merī to shāḳh-e-āshiyāñ kuchh aur kahtī hai

nazar meñ us kī yuuñ to sab kī hī raftār hai lekin

mire qadmoñ se gard-e-kārvāñ kuchh aur kahtī hai

yahāñ kā zarra zarra mahshar-e-ġham hai haqīqat meñ

ba-zāhir raunaq-e-bazm-e-jahāñ kuchh aur kahtī hai

hai un kī hī nazar ā.īna-e-dair-o-haram lekin

yahāñ kuchh aur kahtī hai vahāñ kuchh aur kahtī hai

kisī din saath chhuT jaane kā ḳhatra hai use shāyad

tire ġham se merī umr-e-ravāñ kuchh aur kahtī hai

yahī tum ko yaqīñ kyoñ hai ki koī iltijā hogī

suno to merī chashm-e-ḳhūñfishāñ kuchh aur kahtī hai

mujhe apnī sadāqat par bhī shak hai is zamāne meñ

ki dil kuchh aur kahtā hai zabāñ kuchh aur kahtī hai

jahāñ meñ go nahīñ āsār kuchh aise qayāmat ke

magar gumrāhī-e-ahl-e-jahāñ kuchh aur kahtī hai

kabhī 'kaif' is kā lohā mānte the lucknow vaale

magar ab ahl-e-dehlī kī zabāñ kuchh aur kahtī hai

chaman walon se barq-e-be-aman kuchh aur kahti hai

magar meri to shaKH-e-ashiyan kuchh aur kahti hai

nazar mein us ki yun to sab ki hi raftar hai lekin

mere qadmon se gard-e-karwan kuchh aur kahti hai

yahan ka zarra zarra mahshar-e-gham hai haqiqat mein

ba-zahir raunaq-e-bazm-e-jahan kuchh aur kahti hai

hai un ki hi nazar aaina-e-dair-o-haram lekin

yahan kuchh aur kahti hai wahan kuchh aur kahti hai

kisi din sath chhuT jaane ka KHatra hai use shayad

tere gham se meri umr-e-rawan kuchh aur kahti hai

yahi tum ko yaqin kyon hai ki koi iltija hogi

suno to meri chashm-e-KHunfishan kuchh aur kahti hai

mujhe apni sadaqat par bhi shak hai is zamane mein

ki dil kuchh aur kahta hai zaban kuchh aur kahti hai

jahan mein go nahin aasar kuchh aise qayamat ke

magar gumrahi-e-ahl-e-jahan kuchh aur kahti hai

kabhi 'kaif' is ka loha mante the lucknow wale

magar ab ahl-e-dehli ki zaban kuchh aur kahti hai