chameli ghas par bikhri paDi hai

chamelī ghaas par bikhrī paḌī hai

havā ye baaġh meñ kaisī chalī hai

lakīroñ se bane ik aa.ine meñ

kisī kī shakl uljhī rah ga.ī hai

mirī khiḌkī se chiḌiyāñ uḌ ga.ī haiñ

muñDeroñ kī marammat jab se kī hai

ilāhī ḳhair ho ye kaun aayā

bahut be-vaqt ghanTī baj rahī hai

nikal aa.e achānak ghaas meñ phuul

sitāroñ ne unheñ āvāz dī hai

ḳhatīb-e-shahr ne dīvār kaisī

diloñ ke āñganoñ meñ khīñch dī hai

faqat tārīḳh ko maz.hab samajh kar

abhī tak ham ne kitnī bhuul kī hai

ye sikkoñ kī tamannā kā samar hai

mire bāloñ meñ chāñdī aa ga.ī hai

usī ālūda paanī meñ hamārī

tumhārī 'umr bahtī jā rahī hai

chameli ghas par bikhri paDi hai

hawa ye bagh mein kaisi chali hai

lakiron se bane ek aaine mein

kisi ki shakl uljhi rah gai hai

meri khiDki se chiDiyan uD gai hain

munDeron ki marammat jab se ki hai

ilahi KHair ho ye kaun aaya

bahut be-waqt ghanTi baj rahi hai

nikal aae achanak ghas mein phul

sitaron ne unhen aawaz di hai

KHatib-e-shahr ne diwar kaisi

dilon ke aanganon mein khinch di hai

faqat tariKH ko mazhab samajh kar

abhi tak hum ne kitni bhul ki hai

ye sikkon ki tamanna ka samar hai

mere baalon mein chandi aa gai hai

usi aaluda pani mein hamari

tumhaari 'umr bahti ja rahi hai