chamke hain sab ke baKHt teri jalwa-gah mein

chamke haiñ sab ke baḳht tirī jalva-gāh meñ

vaañ kuchh nahīñ tamīz safed-o-siyāh meñ

rahmat jhalak rahī hai ġhazab kī nigāh meñ

dil pā rahā hai lazzat-e-tā.at gunāh meñ

haiñ jab tujhī pe shaiḳh-o-barahman miTe hue

phir farq kyā hai but-kada-o-ḳhānqāh meñ

pahle vahī bahisht meñ jaa.e to lutf hai

sabqat huī hai jis kī taraf se gunāh meñ

bande huuñ taaki ḳhil.at-e-rahmat ke mustahiq

bhar dī hai kuuT kuuT ke lazzat gunāh meñ

tāsīr-e-āh-o-nāla to ma.alūm haañ magar

dil kā buḳhār ḳhuub nikaltā hai aah meñ

'mushtāq' aa.e raah pe vo shoḳh yā na aa.e

apnī taraf se farq na aa.e nibāh meñ

chamke hain sab ke baKHt teri jalwa-gah mein

wan kuchh nahin tamiz safed-o-siyah mein

rahmat jhalak rahi hai ghazab ki nigah mein

dil pa raha hai lazzat-e-taat gunah mein

hain jab tujhi pe shaiKH-o-barahman miTe hue

phir farq kya hai but-kada-o-KHanqah mein

pahle wahi bahisht mein jae to lutf hai

sabqat hui hai jis ki taraf se gunah mein

bande hun taki KHilat-e-rahmat ke mustahiq

bhar di hai kuT kuT ke lazzat gunah mein

tasir-e-ah-o-nala to malum han magar

dil ka buKHar KHub nikalta hai aah mein

'mushtaq' aae rah pe wo shoKH ya na aae

apni taraf se farq na aae nibah mein