chand ghaDiyan nahin guzri thin shanasai ko

chand ghaḌiyāñ nahīñ guzrī thiiñ shanāsā.ī ko

sho.ala-andām chale aa.e pazīrā.ī ko

kaun jaane vo hasīñ thā ki tamannā merī

DhūñD laa.ī thī kahīñ se mirī rusvā.ī ko

aks Thahrā thā mire dīda-e-tar meñ kab se

ā.īna DhūñD na paayā ruḳh-e-zebā.ī ko

TuuT kar reza hue jaate haiñ sab ḳhvāb mire

kah do girya na kare chashm-e-tamāshā.ī ko

bād-o-bārāñ bhī nahīñ baam nahīñ dar bhī nahīñ

koī chhīno na mire gosha-e-tanhā.ī ko

apne ehsās pe khīñcho na lakīreñ 'shahnāz'

toḌ bhī Daalo but-e-rahzan-e-bīnā.ī ko

chand ghaDiyan nahin guzri thin shanasai ko

shoala-andam chale aae pazirai ko

kaun jaane wo hasin tha ki tamanna meri

DhunD lai thi kahin se meri ruswai ko

aks Thahra tha mere dida-e-tar mein kab se

aaina DhunD na paya ruKH-e-zebai ko

TuT kar reza hue jate hain sab KHwab mere

kah do girya na kare chashm-e-tamashai ko

baad-o-baran bhi nahin baam nahin dar bhi nahin

koi chhino na mere gosha-e-tanhai ko

apne ehsas pe khincho na lakiren 'shahnaz'

toD bhi Dalo but-e-rahzan-e-binai ko