chand gile bhula diye chand se darguzar kiya

chand gile bhulā diye chand se darguzar kiyā

qissa-e-ġham tavīl thā jaan ke muḳhtasar kiyā

jhuuT nahīñ thā ishq bhī ziist bhī thī tujhe aziiz

maiñ ne bhī apnī umr ko apne liye basar kiyā

jaise bhī tere ḳhvāb hoñ jo bhī tire sarāb hoñ

maiñ ne to ret oḌh lī maiñ ne to kam safar kiyā

terī nigāh-e-nāz kā lutf-o-gurez ek saath

shauq thā kuchh agar rahā rañj thā kuchh agar kiyā

TuuT ke phir se juḌ gayā ḳhvāb kā zard silsila

maiñ ne tire firāq ko niiñd meñ hī basar kiyā

raah bahut tavīl thī raah meñ ik fasīl thī

is ko bhī muḳhtasar kiyā us meñ bhī ek dar kiyā

ham to ajiib log the ham ko hazār rog the

ḳhuub kiyā jo aap ne ġhair ko ham-safar kiyā

chand gile bhula diye chand se darguzar kiya

qissa-e-gham tawil tha jaan ke muKHtasar kiya

jhuT nahin tha ishq bhi zist bhi thi tujhe aziz

main ne bhi apni umr ko apne liye basar kiya

jaise bhi tere KHwab hon jo bhi tere sarab hon

main ne to ret oDh li main ne to kam safar kiya

teri nigah-e-naz ka lutf-o-gurez ek sath

shauq tha kuchh agar raha ranj tha kuchh agar kiya

TuT ke phir se juD gaya KHwab ka zard silsila

main ne tere firaq ko nind mein hi basar kiya

rah bahut tawil thi rah mein ek fasil thi

is ko bhi muKHtasar kiya us mein bhi ek dar kiya

hum to ajib log the hum ko hazar rog the

KHub kiya jo aap ne ghair ko ham-safar kiya