chand lamhon ki faraghat hai mayassar jaanan

chand lamhoñ kī farāġhat hai mayassar jānāñ

phir kahāñ husn-o-mohabbat kā ye manzar jānāñ

aañkh bhar kar tujhe ai jān-e-jahāñ dekh to luuñ

jaane le jaa.e kahāñ kal ko muqaddar jānāñ

ye dahakte hue ruḳhsār pe rangīñ āñchal

kaash qaa.em rahe kuchh der ye manzar jānāñ

ye chaman-zār ye kohsār ye bhīgā mausam

is pe terā ye nikhartā huā paikar jānāñ

garm qahve kī mahak aur ye būñdā-bāndī

ye sarā.e ye hasīñ shaam kā manzar jānāñ

kitne tūfān machalte haiñ mire siine meñ

dil hai jazbāt kā bahtā huā sāgar jānāñ

kaif-o-mastī ke vo lamhāt-e-hasīñ ḳhvāb hue

ab kahāñ husn-o-mohabbat kā vo manzar jānāñ

chand lamhon ki faraghat hai mayassar jaanan

phir kahan husn-o-mohabbat ka ye manzar jaanan

aankh bhar kar tujhe ai jaan-e-jahan dekh to lun

jaane le jae kahan kal ko muqaddar jaanan

ye dahakte hue ruKHsar pe rangin aanchal

kash qaem rahe kuchh der ye manzar jaanan

ye chaman-zar ye kohsar ye bhiga mausam

is pe tera ye nikharta hua paikar jaanan

garm qahwe ki mahak aur ye bunda-bandi

ye sarae ye hasin sham ka manzar jaanan

kitne tufan machalte hain mere sine mein

dil hai jazbaat ka bahta hua sagar jaanan

kaif-o-masti ke wo lamhat-e-hasin KHwab hue

ab kahan husn-o-mohabbat ka wo manzar jaanan