chand lamhon mein moamma zist ka hal kar gaya

chand lamhoñ meñ mo'amma ziist kā hal kar gayā

ek dīvāna ḳhirad-mandoñ ko pāgal kar gayā

dhuup taptī ret par dariyā pe bādal kar gayā

us kā har kirdār mere zehn ko shal kar gayā

be-asar be-rabt lahja be-tavāzun guftugū

vo milā bhī to tabī'at aur bojhal kar gayā

maslahat-āmez bāteñ abr ban kar chhā ga.iiñ

dil kā sāvan is tarah barsā ki jal-thal kar gayā

merī aahaT pā ke jis ke chauñk uThte the kivāḌ

koī aaj is ghar kā darvāza muqaffal kar gayā

har taraf ye aam shohrat hai ki koī shah-savār

aaj saare shahr ke logoñ ko paidal kar gayā

sard lahje meñ vo mujh se guftugū karne ke baa'd

jab uThā to rabt-e-zehn-o-dil mo'attal kar gayā

'mauj' us chehre pe likkhā ek lafz-e-intishār

ḳhud-farebī ke sabhī qisse mukammal kar gayā

chand lamhon mein mo'amma zist ka hal kar gaya

ek diwana KHirad-mandon ko pagal kar gaya

dhup tapti ret par dariya pe baadal kar gaya

us ka har kirdar mere zehn ko shal kar gaya

be-asar be-rabt lahja be-tawazun guftugu

wo mila bhi to tabi'at aur bojhal kar gaya

maslahat-amez baaten abr ban kar chha gain

dil ka sawan is tarah barsa ki jal-thal kar gaya

meri aahaT pa ke jis ke chaunk uThte the kiwaD

koi aaj is ghar ka darwaza muqaffal kar gaya

har taraf ye aam shohrat hai ki koi shah-sawar

aaj sare shahr ke logon ko paidal kar gaya

sard lahje mein wo mujh se guftugu karne ke ba'd

jab uTha to rabt-e-zehn-o-dil mo'attal kar gaya

'mauj' us chehre pe likkha ek lafz-e-intishaar

KHud-farebi ke sabhi qisse mukammal kar gaya