chappa-chappa do-jahan ka nur se mamur hai

chappa-chappa do-jahāñ kā nuur se māmūr hai

chashm-e-bīnā ho to har zarra charāġh-e-tūr hai

parda-hā-e-chashm meñ vo jalva-e-mastūr hai

aaj merī har nazar barq-e-jamāl-e-tūr hai

har taraf se ārzū-e-dil mirī mahsūr hai

ya.anī har armān par ik be-kasī māmūr hai

dasht-e-aiman hai na muusā haiñ na koh-e-tūr hai

haañ tirī banda-navāzī aaj tak mash.hūr hai

kis qadar nāzuk taḳhayyul hai junūn-e-shauq kā

mujh se har manzil pe kahtā hai ki manzil duur hai

vo tamanna vus.at-e-kaunain jis ko tang thī

ek goshe meñ dil-e-māyūs ke mahsūr hai

ye ajab andāz hai husn-e-tajallī-rez kā

har nazar meñ jalva-gar har aañkh se mastūr hai

aaj mujh ko be-niyāz-e-har-do-ālam kar diyā

zarra zarra mere dil kā ishq kā mashkūr hai

raah se maiñ haT gayā yā aa ga.ī manzil qarīb

aaj zabt-e-mustaqil kyoñ aah par majbūr hai

ho na ho ab un ke aane kī ḳhabar aane ko hai

ashk to thamte nahīñ haiñ dil magar masrūr hai

un kī qismat ashk jin ke rāt-din thamte nahīñ

aah vo bekas jo zabt-e-āh par majbūr hai

dil mirā minnat-pazīr-e-lutf kyoñ ho ai 'munīr'

husn hai maġhrūr lekin ishq bhī ġhayyūr hai

chappa-chappa do-jahan ka nur se mamur hai

chashm-e-bina ho to har zarra charagh-e-tur hai

parda-ha-e-chashm mein wo jalwa-e-mastur hai

aaj meri har nazar barq-e-jamal-e-tur hai

har taraf se aarzu-e-dil meri mahsur hai

yani har arman par ek be-kasi mamur hai

dasht-e-aiman hai na musa hain na koh-e-tur hai

han teri banda-nawazi aaj tak mashhur hai

kis qadar nazuk taKHayyul hai junun-e-shauq ka

mujh se har manzil pe kahta hai ki manzil dur hai

wo tamanna wusat-e-kaunain jis ko tang thi

ek goshe mein dil-e-mayus ke mahsur hai

ye ajab andaz hai husn-e-tajalli-rez ka

har nazar mein jalwa-gar har aankh se mastur hai

aaj mujh ko be-niyaz-e-har-do-alam kar diya

zarra zarra mere dil ka ishq ka mashkur hai

rah se main haT gaya ya aa gai manzil qarib

aaj zabt-e-mustaqil kyon aah par majbur hai

ho na ho ab un ke aane ki KHabar aane ko hai

ashk to thamte nahin hain dil magar masrur hai

un ki qismat ashk jin ke raat-din thamte nahin

aah wo bekas jo zabt-e-ah par majbur hai

dil mera minnat-pazir-e-lutf kyon ho ai 'munir'

husn hai maghrur lekin ishq bhi ghayyur hai