charagh bujh bhi chuka raushni nahin jati

charāġh bujh bhī chukā raushnī nahīñ jaatī

vo saath saath hai aur bekalī nahīñ jaatī

shabāb-e-rafta phir aatā nahīñ javānī par

ye vo makāñ hai ki jis ko galī nahīñ jaatī

ajiib dar-badarī meñ guzar rahī hai hayāt

ki apne ghar meñ bhī ab be-gharī nahīñ jaatī

chaman ko chāroñ taraf gher kar nahīñ rakhnā

sabā guloñ kī taraf kab chhupī nahīñ jaatī

chalo usī se kareñ baat chārāgar to hai

vo jis se baat kisī kī sunī nahīñ jaatī

matā-e-dard numū ke safar meñ hai shāmil

kalī bahār meñ vaise jalī nahīñ jaatī

fishār-e-vaqt meñ nok-e-qalam huī larzāñ

lahū ke shor meñ dil kī kahī nahīñ jaatī

tamām shahr ra.ūnat kī gard meñ malfūf

aur ek ham haiñ ki vāraftagī nahīñ jaatī

charagh bujh bhi chuka raushni nahin jati

wo sath sath hai aur bekali nahin jati

shabab-e-rafta phir aata nahin jawani par

ye wo makan hai ki jis ko gali nahin jati

ajib dar-badari mein guzar rahi hai hayat

ki apne ghar mein bhi ab be-ghari nahin jati

chaman ko chaaron taraf gher kar nahin rakhna

saba gulon ki taraf kab chhupi nahin jati

chalo usi se karen baat chaaragar to hai

wo jis se baat kisi ki suni nahin jati

mata-e-dard numu ke safar mein hai shamil

kali bahaar mein waise jali nahin jati

fishaar-e-waqt mein nok-e-qalam hui larzan

lahu ke shor mein dil ki kahi nahin jati

tamam shahr raunat ki gard mein malfuf

aur ek hum hain ki waraftagi nahin jati