charagh dosh-e-hawa pe raushan khaDe hue the

charāġh dosh-e-havā pe raushan khaḌe hue the

kamāl ye hai qazā ke sar par chaḌhe hue the

falak ke dāman pe jo sitāre chamak rahe haiñ

hamārī chaukhaT pe sar-ba-sajda paḌe hue the

na.e shajar khilkhilā rahe the ḳhizāñ kī rut meñ

qadīmī peḌoñ ke taaza patte jhaḌe hue the

kisī kī ġhurbat kā nuur ruḳh se chhalak rahā thā

kisī kī baalī meñ hiire motī jaḌe hue the

vahāñ pe sabr-o-razā ne ḳheme lagā.e apne

jahāñ pe zulm-o-sitam ke parcham gaḌe hue the

hamāre zaḳhmoñ se makkhiyoñ ne maze uThā.e

kuchh 'ahd-e-māzī ke ghaav ab tak saḌe hue the

muhājiroñ ko patā hai apne vatan kī qīmat

ye vo parinde haiñ jo yahāñ par baḌe hue the

usī ne pahlā qadam baġhāvat kī samt rakkhā

vo jis kī ulfat ke tiir dil meñ gaḌe hue the

ajal se milne kī aarzū meñ janāb-e-'mehvar'

sharāb-ḳhāne meñ zindagī se laḌe hue the

charagh dosh-e-hawa pe raushan khaDe hue the

kamal ye hai qaza ke sar par chaDhe hue the

falak ke daman pe jo sitare chamak rahe hain

hamari chaukhaT pe sar-ba-sajda paDe hue the

nae shajar khilkhila rahe the KHizan ki rut mein

qadimi peDon ke taza patte jhaDe hue the

kisi ki ghurbat ka nur ruKH se chhalak raha tha

kisi ki baali mein hire moti jaDe hue the

wahan pe sabr-o-raza ne KHeme lagae apne

jahan pe zulm-o-sitam ke parcham gaDe hue the

hamare zaKHmon se makkhiyon ne maze uThae

kuchh 'ahd-e-mazi ke ghaw ab tak saDe hue the

muhajiron ko pata hai apne watan ki qimat

ye wo parinde hain jo yahan par baDe hue the

usi ne pahla qadam baghawat ki samt rakkha

wo jis ki ulfat ke tir dil mein gaDe hue the

ajal se milne ki aarzu mein janab-e-'mehwar'

sharab-KHane mein zindagi se laDe hue the