charagh-e-arzu hai aur main hun

charāġh-e-ārzū hai aur maiñ huuñ

vafā kī justujū hai aur maiñ huuñ

vo chup hai aur maiñ ḳhāmosh lekin

ajab sī guftugū hai aur maiñ huuñ

falak kā shams to bas ik gumāñ hai

mere dil kā lahū hai aur maiñ huuñ

faqat do log haiñ saare jahāñ meñ

ai mere yaar tū hai aur maiñ huuñ

bahut hī duur vo rahtā hai phir bhī

nazar ke rū-ba-rū hai aur maiñ huuñ

nahīñ hotā vo gar ham bhī na hote

vahī to kū-ba-kū hai aur maiñ huuñ

usī kā aks hai saare jahāñ meñ

vo mere chaar sū hai aur maiñ huuñ

kahāñ tanhā huuñ jīvan ke safar meñ

anā hai zid hai ḳhū hai aur maiñ huuñ

mujhe lagtā hai vo mere hī jaisā

koī to hū-ba-hū hai aur maiñ huuñ

tumhāre ishq ke gulshan meñ sāhib

baḌī rangat hai bū hai aur maiñ huuñ

safar hai 'sāhiba' taḳhlīq kā ye

ġhazal kī aabrū hai aur maiñ huuñ

charagh-e-arzu hai aur main hun

wafa ki justuju hai aur main hun

wo chup hai aur main KHamosh lekin

ajab si guftugu hai aur main hun

falak ka shams to bas ek guman hai

mere dil ka lahu hai aur main hun

faqat do log hain sare jahan mein

ai mere yar tu hai aur main hun

bahut hi dur wo rahta hai phir bhi

nazar ke ru-ba-ru hai aur main hun

nahin hota wo gar hum bhi na hote

wahi to ku-ba-ku hai aur main hun

usi ka aks hai sare jahan mein

wo mere chaar su hai aur main hun

kahan tanha hun jiwan ke safar mein

ana hai zid hai KHu hai aur main hun

mujhe lagta hai wo mere hi jaisa

koi to hu-ba-hu hai aur main hun

tumhaare ishq ke gulshan mein sahib

baDi rangat hai bu hai aur main hun

safar hai 'sahiba' taKHliq ka ye

ghazal ki aabru hai aur main hun