charagh-e-dard kabhi yun bujhe bujhe to na the

charāġh-e-dard kabhī yuuñ bujhe bujhe to na the

ham apne aap se itne khiñche khiñche to na the

fusūn-e-chashma-e-sail-e-ravāñ kī umr-e-darāz

un āñsuoñ meñ samundar ruke ruke to na the

shab-e-firāq un āñkhoñ meñ kaT ga.ī hogī

mile vo kal bhī the lekin thake thake to na the

vo saañs letī huī tishnagī vo nahr-e-furāt

laboñ pe pyaas ke dariyā thame thame to na the

vo aañkh ab bhī samajhtī hai ajnabī ham ko

magar ham ahl-e-nazar yuuñ na.e na.e to na the

charagh-e-dard kabhi yun bujhe bujhe to na the

hum apne aap se itne khinche khinche to na the

fusun-e-chashma-e-sail-e-rawan ki umr-e-daraaz

un aansuon mein samundar ruke ruke to na the

shab-e-firaq un aankhon mein kaT gai hogi

mile wo kal bhi the lekin thake thake to na the

wo sans leti hui tishnagi wo nahr-e-furaat

labon pe pyas ke dariya thame thame to na the

wo aankh ab bhi samajhti hai ajnabi hum ko

magar hum ahl-e-nazar yun nae nae to na the