charagh-e-dard ki sham-e-tarab pukarti hai

charāġh-e-dard ki sham-e-tarab pukārtī hai

ik aag sī lab-e-dariyā-e-shab pukārtī hai

adū se jaan bachchī hai na dost bichhḌe haiñ

ye shām-e-giryā hameñ be-sabab pukārtī hai

charāġh-e-shauq pe rah rah ke nuur aatā hai

havā ba-tarz-e-ruḳh-o-chashm-o-lab pukārtī hai

shahīd-e-āb-o-namak haiñ so baḌhte jaate haiñ

shikast o fat.h piyādoñ ko kab pukārtī hai

sadā.eñ de ke bulātī hai shāh-bānu-e-shahr

faqīr jis ke haiñ dekheñ vo kab pukārtī hai

maiñ jaise din kī tab-o-tāb se pareshāñ huuñ

ba-vaqt-e-shām ḳhushī ik ajab pukārtī hai

ham aise kaun anokhe tulūa hote haiñ

jo ham ko dekh ke duniyā ġhazab pukārtī hai

charagh-e-dard ki sham-e-tarab pukarti hai

ek aag si lab-e-dariya-e-shab pukarti hai

adu se jaan bachchi hai na dost bichhDe hain

ye sham-e-girya hamein be-sabab pukarti hai

charagh-e-shauq pe rah rah ke nur aata hai

hawa ba-tarz-e-ruKH-o-chashm-o-lab pukarti hai

shahid-e-ab-o-namak hain so baDhte jate hain

shikast o fath piyaadon ko kab pukarti hai

sadaen de ke bulati hai shah-banu-e-shahr

faqir jis ke hain dekhen wo kab pukarti hai

main jaise din ki tab-o-tab se pareshan hun

ba-waqt-e-sham KHushi ek ajab pukarti hai

hum aise kaun anokhe tulua hote hain

jo hum ko dekh ke duniya ghazab pukarti hai