charagh-e-ishq jala lun to koi baat karun

charāġh-e-ishq jalā luuñ to koī baat karūñ

añdhere dil ke miTā luuñ to koī baat karūñ

luTā duuñ raah meñ us kī maiñ apnī sab pūñjī

zarā sī nekī kamā luuñ to koī baat karūñ

ġhubār-e-vaqt meñ uljhī hai merī rāhguzar

safar kī laaj bachā luuñ to koī baat karūñ

bahut udaas hai raat aur rū-ba-rū hai firāq

navā-e-'mīr' sunā luuñ to koī baat karūñ

mujhe bhī dasht kī āvārgī se rabt hai kuchh

ye ḳhāk-e-dasht uḌā luuñ to koī baat karūñ

palaT ke aa.e ho muddat ke baa'd āñkhoñ meñ

ye ashk-e-hijr girā luuñ to koī baat karūñ

sahārā donoñ jahāñ meñ amal kā hai 'resham'

ye baat sab ko batā luuñ to koī baat karūñ

charagh-e-ishq jala lun to koi baat karun

andhere dil ke miTa lun to koi baat karun

luTa dun rah mein us ki main apni sab punji

zara si neki kama lun to koi baat karun

ghubar-e-waqt mein uljhi hai meri rahguzar

safar ki laj bacha lun to koi baat karun

bahut udas hai raat aur ru-ba-ru hai firaq

nawa-e-'mir' suna lun to koi baat karun

mujhe bhi dasht ki aawargi se rabt hai kuchh

ye KHak-e-dasht uDa lun to koi baat karun

palaT ke aae ho muddat ke ba'd aankhon mein

ye ashk-e-hijr gira lun to koi baat karun

sahaara donon jahan mein amal ka hai 'resham'

ye baat sab ko bata lun to koi baat karun