charagh-e-jaan hum batao kab tak jala ke rakkhen

charāġh-e-jāñ ham batāo kab tak jalā ke rakkheñ

diye pe ehsān kitne āḳhir havā ke rakkheñ

hameñ jo bigḌā huā samajhtā hai laakh samjhe

hamīñ tumhāre jahān se kyoñ banā ke rakkheñ

uThā liyā hai jo jaam ham ne to thamnā kaisā

ab aap apnī nasīhateñ sab uThā ke rakkheñ

tum aaj fursat meñ ho yā uljhī huī ho jānāñ

ham aaj ḳhud ko miTā deñ yā phir bachā ke rakkheñ

agar na aanā hai aaj tum ko to so leñ ham bhī

jo ḳhvāb meñ aa rahe ho palkeñ bichhā ke rakkheñ

use sunā deñ ġhazal kahī hai jo ruuTh us se

yā ham laboñ par ḳhamoshiyoñ ko sajā ke rakkheñ

jo aap nā-āshnā haiñ ham se to sharm kaisī

haiñ 'āshnā' to huzūr dil se lagā ke rakkheñ

charagh-e-jaan hum batao kab tak jala ke rakkhen

diye pe ehsan kitne aaKHir hawa ke rakkhen

hamein jo bigDa hua samajhta hai lakh samjhe

hamin tumhaare jahan se kyon bana ke rakkhen

uTha liya hai jo jam hum ne to thamna kaisa

ab aap apni nasihaten sab uTha ke rakkhen

tum aaj fursat mein ho ya uljhi hui ho jaanan

hum aaj KHud ko miTa den ya phir bacha ke rakkhen

agar na aana hai aaj tum ko to so len hum bhi

jo KHwab mein aa rahe ho palken bichha ke rakkhen

use suna den ghazal kahi hai jo ruTh us se

ya hum labon par KHamoshiyon ko saja ke rakkhen

jo aap na-ashna hain hum se to sharm kaisi

hain 'ashna' to huzur dil se laga ke rakkhen