charagh-e-KHwab-e-shikasta ki lau hai maddham dekh

charāġh-e-ḳhvāb-e-shikasta kī lau hai maddham dekh

kabhī to aa mirī tanhā.iyoñ kā aalam dekh

javāz DhūñD rahī haiñ ka.ī nigāheñ yahāñ

ye terī marzī hai tū chāhe mujh ko kam-kam dekh

hamāre shahr meñ sachchā.iyāñ muqayyad haiñ

yaqīñ na aa.e to chal ā.inoñ kā mātam dekh

abhī Thahar ai janāza paḌhāne vaale shaḳhs

badan ke malbe ke nīche dabe hue ġham dekh

yahāñ bhī mas.ala bai'at kā hī rahā hogā

lahū meñ Duube hue haiñ hazāroñ parcham dekh

yahāñ ke logoñ se ummīd rakh vafāoñ kī

ki muddatoñ yahāñ badle nahīñ haiñ mausam dekh

kabhī bhulā to diyā thā use magar 'āfāq'

palak jhapakte hī kyuuñ aañkh ho ga.ī nam dekh

charagh-e-KHwab-e-shikasta ki lau hai maddham dekh

kabhi to aa meri tanhaiyon ka aalam dekh

jawaz DhunD rahi hain kai nigahen yahan

ye teri marzi hai tu chahe mujh ko kam-kam dekh

hamare shahr mein sachchaiyan muqayyad hain

yaqin na aae to chal aainon ka matam dekh

abhi Thahar ai janaza paDhane wale shaKHs

badan ke malbe ke niche dabe hue gham dekh

yahan bhi masala bai'at ka hi raha hoga

lahu mein Dube hue hain hazaron parcham dekh

yahan ke logon se ummid rakh wafaon ki

ki muddaton yahan badle nahin hain mausam dekh

kabhi bhula to diya tha use magar 'afaq'

palak jhapakte hi kyun aankh ho gai nam dekh